Not Found!(404)

Girgizar kasa ta Wenchuan da ta faru ba zato ba tsammani a shekaru 13 da suka wuce, ita ce girgizar kasa mafi yin barna, kuma mafi wuyar gudanar da ayyukan ceto, wadda kuma ta shafi yankuna mafi yawa a kasar Sin. Tun bayan kafuwar sabuwar kasar, girgizar kasan ta kashe mutane kimanin dubu 80 tare da lalata rayuwar iyalai da dama. Niu Yu na daya daga cikin miliyoyin mutanen da bala’in ya shafa.

A shekara ta 2008, an binne Niu Yu 'yar shekaru 11 a karkashin baraguzan girgizar kasar na tsawon kwanaki uku, bayan da aka ceto ta, an yanke kafarta ta dama, kuma an yi mata tiyata fiye da sau 30 don ceto kafarta ta hagu. Amma, wannan yarinya ba ta taba rasa kwarin gwiwa a rayuwa ba. A yau, za mu kawo muku labarin yarinyar nan mai suna Niu Yu.

Lokacin da girgizar kasa ta Wenchuan ta auku a ranar 12 ga watan Mayun shekarar 2008, Niu Yu, wadda ke aji na biyar a makarantar firamare, tana koyon Turanci a makarantar. Ranar ce kuma ranar cikar ta shekaru 11 a duniya. Ta yi fatan hura kyandir da kuma cin waina tare da iyayenta bayan ta kammala karatu a makaranta.

Amma, a daidai wannan lokacin, fitilun da aka rataye a saman ajin sun fara rawa da karfi, kuma matakalar ginin suka rika karkadawa, malamin ya gano cewa, girgizar kasa ce ta faru. Nan da nan ya gaya wa daliban su fice cikin sauri bisa tsari. Amma an riga an makara, benaye suka karye saboda girgizar kasar, kuma gini ya danna Niu Yu.

Bayan da ta makale na tsawon kwanaki uku da dare uku, an ceto Niu Yu. Amma dukkan tantanin halittar kafar daman ta sun lalace, ta yadda dole aka yanke ta kuma aka sanya mata na karfe.

Lokacin da komai ya dawo daidai, Niu Yu ta koma makaranta, kuma ta daina rawa da ta fi so a baya. Ta kan yi kishi idan ta ga sauran ‘yan mata sanye da kaya masu kyau da gajeren siket, saboda nakasar kafarta, ita kuwa a duk tsawon shekara tana sanya da dogon wando kadai.

Amma Niu Yu ba ta yi watsi da fatanta kan makoma ba, ta kara kokari kan karatu cike da imani kan zaman rayuwa.

Saboda Niu Yu ta dade ba ta motsa jiki, kafarta ta dama ta fara shanyewa, likitan ya gaya mata cewa, idan ta ci gaba da yin haka, ba za ta iya tafiya yadda ya kamata ba, idan shekarunta na haihuwa suka kai 40.

A ranar 12 ga watan Mayu na shekarar 2018, wato lokaci da ta cika shekaru goma da tuna aukuwar girgizar kasar Wenchuan, an yi shirin gudanar da wasan Marathon na rabin zango a yankin. Wadanda suka halarci gasar sun kasance mutanen da suka taba fuskantar girgizar kasar Wenchuan. Niu Yu ta kuma yi rajistar halartar wasan, ta yi ta motsa jiki sosai a kowace rana, daga rabin sa'a a farko zuwa sa'o'i hudu ko biyar a karshe.

A yayin wasan, ta zage damtse wajen fallasa karayar kafarta a idanun jama'a, sannan wata kawarta ta rike ta don fara wasan.

Sau da yawa ciwon kafarta ta ya sa ta so ta janye jiki daga gasar, amma kullum akwai wata murya a cikin zuciyarta dake gaya mata cewa, dole ta yi tsayin daka. Minti goma, minti ashirin, sa'a daya,... A karshe, bayan fiye da sa'o'i hudu, Niu Yu ta kammala wasanta na Marathon na rabin zango.

Duk da ta kwanta kusan kwana uku bayan wasan, amma ba ta yi bakin ciki ba saboda ta shawo kan matsaloli a kan tunani da nakasar ta ke haifarwa.

A ranar 11 ga watan Oktoba na shekarar 2021, wani abu da ya canza rayuwar Niu Yu ya faru a wannan rana, “Makon Kaya na Shanghai” wato shahararren bikin nuna kayayyakin gayu ya gayyaci Niu Yu don halartar bikin nuna kayan zamani.

Da ta samu labarin, Niu Yu ta yi farin ciki kwarai da gaske, saboda nuna kayan zamani a dandalin ya kasance burinta ne a cikin dogon lokaci. Amma, saboda nakasarta, babu wani bikin da ya amince da irin bukatarta.

Gaskiya, wannan dama ce mai kyau gare ta, kuma nan da nan ta karbi gayyatar da farin ciki. Daga baya kuma Niu Yu, wadda ba ta da gogewa a fagen nuna kayan gayu, ta fara koyan ilimin da ya dace game da tafiya a dandali.

Ba da dadewa ba, ranar 11 ga watan Oktoba ta zo, Niu Yu tana sanye da farar riga mai kaho da siket mai ninki-ninki, tare da sanya kyawawan lamuni a kafar ta ta dama ta karfe.

A yayin da take tafiya a dandali don nuna kayayyakin zamani, imanin da ta nuna ya burge masu kallo sosai, kuma sun yi ta tafi don nuna mata yabo.

An sanya bidiyon game da wannan biki a intanet, masu bibiyar yanar gizo sun ce, nune-nunen da Niu Yu ta yi, ya burge mu, da kuma ba mu mamaki sosai, har ma ta fi wasu shahararrun masu nuna kayan gayu, ta bayyana jajircewar nakasassu.

Niu Yu ta dauki bidiyo masu yawa iri daban daban, game da yadda take zaman rayuwa, ta kuma sanya su a yanar gizo. A cikin bidiyon, ta kan sanya fitilu masu launuka daban daban kan kafarta ta karfe, a karkashin hasken dare, kafar dama ta Niu Yu tana da kyau sosai, har ta fi ta ainihin kafa.

Wata rana, yayin da Niu Yu ke cikin motar taxi, direban ya tambaye ta cewa, me ya lalata mata kafa. Ita kuwa Niu Yu ta gaya wa direban gaskiya, direban ya dagawa Niu Yu babban yatsa don nuna yabo.

Yanzu dai Niu Yu ta saba da irin wannan rayuwar, kuma dauka da tsara gajerun bidiyoyi ya kasance muhimmin aikinta, tana da raye-raye da fara'a kuma masu amfani da yanar gizo suna sonta sosai.

Niu Yu ta cimma burinta daya bayan daya ta iyakacin kokarin da ta yi, kuma ya zama wani ma'auni ga nakasassu.

Umar Tijjani Abdullahi, dan jihar Kano dake tarayyar Najeriya ne, wanda ya taba yin karatu a fannin injiniya na gine-gine a wata jami’a dake birnin Shenyang na kasar Sin, daga shekara ta 2015 zuwa ta 2019.

A zantawar sa da Murtala Zhang, malam Umar ya bayyana cewa, akwai bambancin yanayin karatu tsakanin gida Najeriya da kasar Sin, kuma yana fatan yin amfani da ilimin da ya samu a Sin don inganta abubuwa a Najeriya.

A karshe malam Umar ya yi kira ga daliban Najeriya, da suke karatu a kasar Sin, da su dage wajen yin karatu, don a nan gaba za su iya samun damar bautawa kasarsu. (Murtala Zhang)

A ranar 9 ga watan Disamban wannan shekra ce, kasar Amurka ta kira wani taron da ta sanya ma taken wai “Taron kolin dimokuradiyya.” A yayin bikin bude taron, shugaban kasar Amurka Joe Biden ya ce, dimokuradiyya na fuskantar kalubale a fadin duniya, kuma wai dimokuradiyya na bukatar kariya.

Kamar yadda Emma Ashford, babbar manazarciya a hukumar Atlantic Council ta bayyana cikin wani sharhi da aka wallafa a mujallar “Foreign Policy” cewa, “Idan babu wani tsarin dimokuradiyya da ke iya aiki yadda ya kamata a cikin kasar Amurka, to, ta yaya za ta iya wanzar da dimokuradiyya tare da zama misali ga sauran kasashe?”

Demokuradiyya dai shi ne yadda jama’ar kasa ke iya gudanar da harkokinta. Kamar yadda shugaban kasar Sin Xi Jinping ya ce, dimokuradiyya ba abin ado ba ne, abu ne da ke taimaka wa wajen daidaita matsalolin da al’umma ke fuskanta.

Akwai hanyoyi da dama na wanzar da dimokuradiyya a maimakon tsarin da kasashen yamma ke bi. Yadda za a tabbatar da zaman walwalar jama’a shi ne ma’auni daya kacal na tantance tsarin dimokuradiyyar wata kasa yana da kyau ko a’a. Wani abin takaici shi ne, a yayin da shugaba Biden ke lacca a kan batun dimokuradiyya, wasu a wajen hedkwatar MDD da ke birnin New York, kuma suna gudanar da zanga-zanga dauke da wani akwatin gawo da aka rubutawa “Dimokuradiyyar Amurka” a jikinsa, don gudanar da jana’izar dimokuradiyyar kasar. (Saminu, Ibrahim/Sanusi Chen)

Wasan Kongzhu yana da dogon tarihi a kasar Sin. Wasan gargajiya ne na kasar Sin, wanda ya samu shahara a tsawon shekaru fiye da 600 a kasar Sin. Ana bukatar fasahohi wajen yin wasan Kongzhu.

Liu Yihua mai shekaru 26 da haihuwa, tsohuwar daliba ce a jami’ar koyon ilmin wasannin motsa jiki ta birnin Shanghai, wadda ta gama karatu a shekarar bara, ta kuma fara aiki a wata makaranta. Yayin da take karatu a jami’a, ta yi nazari kan wasannin gargajiya na kasar Sin, kana ta koyi fasahohin wasu wasan gargajiya na kasar Sin, kamar su ‘yar igiya, da wasan Kongzhu.

Da farko dai, Liu Yihua ta koyi fasahohin ‘yar igiya a jami’a. Game da yaya ta fara koyon wasan Kongzhu, akwai wani labari mai ban sha’awa. Wato a lokacin da take karatu a digiri na biyu a jami’ar, wata abokiyar karatunta dake zaune a daki guda tare da Liu Yihua, ta yi nazari kan batun dake shafar wasan Kongzhu. Don haka, a lokacin da babu karatu, ita da Liu Yihua su kan yi wasan Kongzhu tare. Daga baya, an kafa wani kwas na musamman na koyar da fasahohin wasan Kongzhu a jami’ar, Liu Yihua da abokanta su shiga kwas din tare da fara wasan Kongzhu. Ana iya cewa, abokiyarta ta jawo Liu Yihua ta shiga wasan Kongzhu.

Bayan da ta fara koyon wasan Kongzhu, ta gano wasu alamu musamman na wasan dake bambanta da sauran wasannin gargajiya na kasar Sin. Liu Yihua ta bayyana cewa,“Na farko, a ganina wasan Kongzhu na da sauki, inda ake daukar wata igiya da wani kwanon Kongzhu, sai a yi wasan a ko ina. A yanzu, na shiga aiki, amma ina ajiye Kongzhu a cikin jaka ta. Zan yi wasan idan ina da lokaci. Na biyu kuma, ana yin amfani da kafada da wuya wajen yin wasan Kongzhu, kuma idan na yi aiki har na tsawon lokaci, zan yi wasan Kongzhu don sassauta ciwo da gajiyar kafada da wuya na.”

Liu Yihua ta ce, tana ganin wasan Kongzhu wasa ne maras wuya, kuma idan tana son koyon wata fasahar wasan mai wuya, tana iya kara kokari har ta cimma nasara. A ganinta, wasan Kongzhu wasa ne mai ban sha’awa, ba ta jin wuya ko gajiya wajen yin wasan.

Liu Yihua na ganin cewa, wasan Kongzhu ya kawo wasu canji ga aikinta da kuma zaman rayuwarta. Game da aikin, tana kokarin shigar da wasan zuwa kwas da ta koya, kuma a zaman rayuwarta, tana samun kwanciyar hankali yayin da take yin wasan Kongzhu. Liu Yihua ta bayyana cewa,“A halin yanzu, ni malama ce a wata makaranta dake birnin Shanghai. Yayin da nake aiki, ina iya koyar wa dalibai na fasahohin wasan Kongzhu. Ta haka za a kara shigar da sabon salon wasannin motsa jiki a kwas din makarantar. Kana ina son kafa kwas na musamman, don koyar da fasahohin wasan Kongzhu. Kaza lika a zaman rayuwata, yin wasan Kongzhu zai taimaka min wajen kwantar da hankali da jin dadi.”

Liu Yihua ta ce, har yanzu ba ta taba halartar gasar wasan Kongzhu ba tukuna, amma ta taba gwada fasahohin wasan Kongzhu a wasu bukukuwa. Kana ba ta halarci kowace jarrabawa, da auna kwarewarta a wasan Kongzhu ba. Amma ta ce, a jami’arta, an taba gabatar da ma’aunin matsayin fasahohin wasan Kongzhu, inda ta koyi fasahohi bisa ma’aunin don inganta fasahohinta kan wasan.

Game da salon wasan Kongzhu, Liu Yihua ta ce, ban da damar mutum daya ya yi wasan, akwai kuma yadda mutane biyu ko mutane da yawa ke yin wasan tare. Idan mutane biyu suna yin wasan Kongzhu tare, suna iya yin wasan da gwada fasahohi iri daya, kana suna iya yin hadin gwiwa da jefawa da karbo Kongzhu a yayin wasan. Game da mutane da ke yin wasan Kongzhu tare, Liu Yihua ta bayyana cewa, a kan shigar da kide-kide da raye-raye a cikin wasan Kongzhu. Ta ce,“A ajin koyon wasan Kongzhu a jami’armu, daliban ajin su kan koyi wani shirin musamman na hadin gwiwa a kowane rabin shekara na karatu, dukkan su suna koyon fasahohi, da gwada kwarewarsu, da kuma yin hadin gwiwa tare da kide-kide da raye-raye.”

Liu Yihua ta kara da cewa, ban da raye-raye, wasan Kongzhu yana hade da wasu wasannin gargajiya na kasar Sin, kamar wasan Wushu da ‘yar igiya da sauransu. Kana ta ce ta taba kallon wani shirin da aka gwada a kasashen waje, inda aka gwada hada wasan Kongzhu da wasan kwaikwayo na dandali.

Zhan Jing, abokiyar karatun jami’a ta Liu Yihua ce, ta kuma bayyana cewa, abu mafi burgewa game da Liu Yihua shi ne, Liu Yihua ba ma kawai tana aikinta mai kyau ba ne, har ma tana yin kokari don maida aikinta mafi kyau. Ta ce wasan Kongzhu ya taimakawa Liu Yihua wajen kwantar da hankali da kara jin dadin rayuwarta. Zhan Jing ta ce,“Bayan da ta fara yin wasan Kongzhu, ta kara maida hankali ga koyon fasahohin wasan, da kara nuna sha’awar wasan. Kana ta kiyaye yin kokari wajen raya fasahohinta na wasan. Lokacin da ta fuskanci matsaloli yayin koyon fasahohin wasan, ta kan tambayi malamanmu, da tattaunawa tare da mu don warware matsalolin tare.”

Game da bunkasuwar wasan Kongzhu a kasar Sin, Liu Yihua ta ce tana yin nazari kan wannan batu a halin yanzu, ta kuma gano cewa, yanzu wasan Kongzhu ya samu karbuwa sosai a yankin Taiwan na kasar Sin, har matsayin wasan a yankin ya kai na wasan kwallon kwando, da kwallon kafa a babban yankin kasar Sin. Kana ta san cewa an kafa wasu kwas na koyar da fasahohin wasan Kongzhu a wasu jami’o’in kasashen waje. Amma ban da su, babu mutane da dama da suke sha’awar wasan Kongzhu a zamanin yanzu. Kaza lika a birnin Shanghai, yawancin mutanen da suke yin wasan tsofaffi ne. A ganin Liu Yihua, dukkan mutane, ko yara ko balagai, ko tsofaffi, suna iya yin wasan Kongzhu. Ta ce an fara shigar da wasu kwas na musamman na koyar da daliban makarantun firamare a birnin Shanghai, don sa kaimi ga yara su maida hankali ga irin wasan motsa jiki na gargajiya na kasar Sin. Liu Yihua ta ce, a wasu shekaru fiye da 10 da suka gabata, matasan kasar Sin suna son koyon fasahohi ko batutuwa daga kasashen waje. A ganinsu abubuwa na kasashen waje suna da kyau. Amma a wadannan shekaru, matasan kasar Sin suna son al’adun gargajiya na kasar Sin sosai. Ta ce “A wasu lokuta yayin da nake yin wasan Kongzhu a jami’a, akwai wasu yara ko matasa, da suke zuwa su tambaye ni game da wasan Kongzhu. Su kan ce, wannan abun gargajiya ne na kasar Sin? Babu shakka yana da kyau ssoai, suna sha’awar sa, da kuma alfahari da al’adun gargajiya na kasar Sin. Don haka, koda yake a da an daina bunkasa wasu abubuwan gargajiya na kasar Sin, amma yanzu mutanen kasarmu suna alfahari da abubuwan gargajiya na kasar Sin, suna kuma son raya su. Liu Yihua ta bayyana cewa,“Wasannin gargajiya na kasar Sin suna da kyakkyawar makoma. Koda yake mun rasa wasu damar bunkasa su a da, amma yanzu kasarmu ta samu ci gaba, muna kara alfahari da al’adunmu sosai. Za mu kara maida hankali, da nuna sha’awa ga abubuwan dake shafar al’adun gargajiya na kasar Sin.”

A matsayin wata malama mai koyar da wasannin motsa jiki a makaranta, Liu Yihua tana son ci gaba da bunkasa wasannin gargajiya na kasar Sin, da shigar da sabbin salon wasannin motsa jiki a cikin kwas na wasanni a makaranta, da kuma koyar da dalibai fasahohin wasannin motsa jiki iri daban daban. Tana kuma fatan ta hakan, dalibanta za su kara jin dadin rayuwarsu ta hanyar yin wasannin.

A ganin Liu Yihua, wasannin gargajiya na kasar Sin, musamman wasan Kongzhu ba lafiyar jiki kadai yake kawo mata ba, har ma ya taimake ta wajen kwantar da hankalinta. Tana jin dadin yin wasan sosai, kana tana fatan za a bunkasa wasannin gargajiya na kasar Sin, kuma karin mutane za su shiga wasannin a nan gaba. (Zainab Zhang)

A kwanan baya, Bello Wang ya ziyarci birnin Guangzhou dake kudancin kasar Sin, don watsa labarai game da wani taron da ya gudana a can mai taken “Fahimtar kasar Sin”, inda ya yi hira da wasu manyan kusoshi na kasashe daban daban, wadanda suka fahimci yanayin da kasar Sin ke ciki sosai. A cikin shirinmu na yau, bari ku saurari hirar da ya yi da daya daga cikin wadannan mutane, mai suna William Brown, wani shehun malami dan kasar Amurka dake aiki a jami’ar Xia’men ta lardin Fujian na kasar Sin.