|
Yau ran 15 ga wata, gasar Olympic ta Beijing ta shiga kwana na 7. Ya zuwa karfe 3 na wannan rana da yamma, an fitar da lambobin zinariya 6, kuma an karya matsayin bajinta na wasan iyo.
A gun gasar wasan iyo na salon kwado na mata na zangon mita dari 2 da aka yi a ran 15 ga wata, Soni Rebecca, wata 'yar wasa ta kasar Amurka ta samu lambar zinariya da minti 2 da dakika 20 da 22, kuma ta karya matsayin bajinta na duniya.
A waje daya kuma, a gun gasar iyo ta salon ringine ta maza ta zangon mita dari 2, Lochte Ryan, dan wasa na kasar Amurka ya samu wata lambar zinariya, kuma ya karya matsayin bajinta na duniya.
Bugu da kari kuma, a gun gasar wasan iyo da ke hade da salo iri iri na maza na zangon mita dari 2, Phelps Michael, wani sannanen dan wasa na kasar Amurka ya samu wata lambar zinariya, kuma ya karya matsayin bajinta na duniya. Sakamakon haka, ya zuwa yanzu, ya riga ya samu lambobin zinariya 6 a gun gasar Olympic ta Beijing, kuma ya karya matsayin bajinta har sau 6.
Haka kuma, a gun gasar wasan iyo ta Freestyle ta mata ta zangon mita dari 1, Steffen Britta, 'yar wasa ta kasar Jamus ta samu lambar zinariya. Ayvazian Artur, dan wasa na kasar Ukraine ya samu lambar zinariya a gun gasar karshe ta harbe-harbe ta maza ta zangon mita 50. Liukin Nastia, 'yar wasa ta kasar Amurka ta samu lambar zinariya a gun gasar wasan lankwashe jiki ta mata.
Yau da maraice da yamma, za a ci gaba da fitar da sauran lambobin zinariya 12 a gun gasanni iri iri. (Sanusi Chen)
|
