|
A ran 27 ga wata da yamma, bisa labarin da ofishin watsa labarai na majalisar gudanarwa ta kasar Sin ya bayar bisa umurnin babban ofishin ba da umurni kan fama da girgizar kasa da gudanar da ayyukan ceto na majalisar gudanarwa ta kasar Sin, an ce, ya zuwa ran 27 ga wata da safe da karfe 12, girgizar kasa da ta auku a gundumar Wenchuan ta lardin Sichuan na kasar Sin ya riga ya yi sanadiyar mutuwar mutane 67183 yayin da mutane dubu 360 suka jikata, kuma mutane 20790 suka bace, ban da wannan kuma an riga an kaurar da mutane da kuma tsugunar da su fiye da miliyan 15. Yawan mutanen da ke fama da bala'in ya kai fiye da miliyan 45.6.
Ya zuwa ran 27 ga wata da dare da karfe 12, an riga an ceci mutane da kuma kaurar da su kusan dubu 700, da kuma kubutad da mutane 6541 daga kangaye.
Ban da wannan kuma ya zuwa ran 27 ga wata da safe da karfe 12, yawan mutanen da suka samu jiyya a cikin asibitoci domin jin rauni a cikin girgizar kasa ya kai kusan dubu 85, kuma a ciki an sallame su dubu 54 daga asibitocin, haka kuma birnin Chongqing da dai sauran larduna 17 sun karbi 'yan lardin Sichuan masu jikata 6363
Bugu da kari kuma ya zuwa ran 27 ga wata da yamma da karfe 2, gwamnatoci na matakai daban daban na kasar Sin sun kebe kudaden Sin Yuan biliyan 19.2 wajen fama da girgizar kasa. Ya zuwa ran 27 ga wata da safe da karfe 12, yawan kudade da kayayyakin taimako da kasar Sin ta samu daga gida da waje ya kai Yuan biliyan 32.7.(Kande Gao)
|
