|
Wasan Triathlon, wani irin wasa ne da ya kunshi ninkaya da tseren keke da kuma gudun fanfalake, ya kuma kawo wa 'yan wasa kalubale ta fuskar karfi da sauri da fasaha a lokaci daya. Ya bullo ne a shekarar 1973. A shekara mai zuwa, irin wannan wasa da ya kalubalanci iyakar kwarewar mutane zai sauko matarin ruwa na Shisanling da ke nan Beijing saboda za a yi gasar wasannin Olympic a lokacin.
Shahararren matarin ruwa na Shisanling na cikin gundumar Changping da ke arewacin Beijing, nisan da ke tsakaninsa da yankin tsakiya na Beijing ya kai misalin kilomita 40. A shekarar 2008, a lokacin da ake yin gasar wasannin Olympic ta Beijing, 'yan wasan Triathlon da suka fito daga wurare daban daban na duniya za su kara da juna a cikin gasar ninkaya mai tsawon kilomita 1.5 da tseren keke mai tsawon kilomita 40 da kuma gudun fanfalake mai tsawon kilomita 10 a wannan shahararren matarin ruwa. Yanzu a lokacin da kuke yawo a kan madatsar ruwan, ku yi hange nesa, to, za ku iya ganin cewa, shuddan hanyoyin tsere da shudin sararin sama suna kara wa juna haske, suna da kyaun gani sosai tare kuma da ni'imtaccen matarin ruwa na Shisanling. Fadin hanyoyin tsere ya yi kusan daidai da na filayen wasan kwallon kafa guda 2. A karo na farko ne aka shimfida hanyoyin tsere masu fadin haka a kasar Sin. An shimfida hanyoyin tsere masu inganci da aka sarrafa su a masana'antu tare. Wadannan hanyoyin tsere da aka yanka su yadda ya kamata sun rufe cikakken filin wasan, ta haka, dukkan doron kasa na filin wasan ya yi laushi sosai. Sa'an nan kuma, an cika giyabun da ke tsakanin hanyoyin tseren yadda ya kamata, har ma mutane ba su gane cewa akwai giyabu ba. Wasu 'yan wasa na gida da na ketare da suka yi gasar share fage a wajen sun nuna matukar gamsuwa kan muhallin halittu a wannan filin wasa da kuma ingancin hanyoyin tsere.
Ran 15 zuwa ran 16 ga watan Satumba na shekara ta 2007, an kira gasar cin kofin duniya ta wasan Triathlon ta 'Good Luck Beijing' a filin wasa da ke matarin ruwa na Shisanling. Wannan ne gasar share fage da aka yi domin shirin wasan Triathlon na gasar wasannin Olympic ta Beijing. Masu shirya gasar wasannin Olympic ta Beijing sun kara yawan kujeru, ta haka, yawan 'yan kallo sun karu zuwa dubu 6 a maimakon dubu daya a da. Ban da wannan kuma, an tsawaita tsawon hanyar ninkaya da ke gaban madatsar ruwan, ta haka, tsawon hanyar ninkaya ya yi daidai da na shirin wasan Triathlon na gasar wasannin Olympic. Bugu da kari kuma, don tabbatar da jin dadin kallon gasar, an shimfida wata sabuwar hanya mai tsawon mita 700 bisa hanyar rarraba ambaliyar ruwa ta matarin ruwa na Shisanling, ta haka, za a iya biyan bukatun 'yan wasa da za su iya wucewa dandamalin 'yan kallo har sau 6 a cikin gasar, 'yan kallo za su iya jin dadin kallon gasar.
|
