" An rigaya an kammala akasarin muhimman ayyukan share fagen taron wasannin Olympics na Beijing daidai bisa shirin da aka tsara", in ji Mr. Liu Jinmin, mataimakin magajin birnin Beijing kuma mataimakin shugaban kwamitin shirya taron wasannin Olympics na Beijing a gun wani taron ganawa da manema labaru da aka gudanar kwanan baya ba da dadewa ba a nan birnin Beijing,inda ya kuma fadi cewa, hakan ya aza tubali mai inganci ga gudanar da taron wasannin Olympics na Beijing a shekarar 2008 lami-lafiya.

Aminai 'yan Afrika, ko kuna sane da cewa, kwanaki kasa da 300 ke nan da suka rage a gudanar da wannan gagarumin taron wasanni. Shekaru sama da 6 da suka shige bayan da gwamnatin birnin Beijing ta cimma nasarar daukar bakuncin taron wasannin Olympics na Beijing a shekarar 2008, ana gudanar da ayyukan share fage iri daban-daban kamar yadda ya kamata duk bisa goyon baya daga gwamnatin kasar Sin da jama'arta. A gun taron ganawa da manema labaru da aka gudanar a albarkacin babban taron wakilan duk kasa na Jam'iyyar Kwaminis ta Sin a karo na 17, Mr. Liu Jinmin ya bayyana cewa: " Yanzu, an rigaya an kammala muhimman ayyuka iri daban-daban na share fagen taron wasannin Olympics daidai cikin lokaci, wato ke nan an kammala gina filaye da dakuna 27 na yin gasanni daga cikin 37, wadanda za a yi amfani da su domin taron wasannin Olympics na Beijing; Ban da wannan kuma an riga an tabbatar da shirye-shiryen gudanar da bikin taron wasannin Olympics na Beijing da kuma bikin rufe shi; Kazalika,yanzu ana gaggauta yin ayyukan shirin mika wutar yula mai tsari ta wannan kasaitaccen taron wasannin Olympics".