Wata sabuwar kuma, a ran 21 ga wata, a nan Beijing, wani jami'in hukumar kiyaye muhalli ta Beijing ya sanar da cewa, jarrabawar ba da tabbaci ga gasannin motsa jiki na 'Good Luck Beijing' ta fuskar muhalli da zirga-zirga ta sami sakamako mai kyau, wadda aka yi tun daga ran 17 zuwa ran 20 ga wata a nan Beijing. A cikin wadannan kwanaki 4, ingancin iskar Beijing ya biya bukatar yin gasannin motsa jiki kwata-kwata. Jarrabawar ta bai wa Beijing bayanai masu dimbin yawa wajen tsara 'shirin kyautata muhalli a lokacin taron wasannin Olympic'.

Ran 25 ga wata, a birnin Osaka na kasar Japan, an bude gasar fid da gwani ta wasan tsalle-tsalle da guje-guje ta kasa da kasa a karo na 11. 'Yan wasa fiye da dubu 2 daga kasashe da yankuna 203 na duk duniya sun shiga gasar. Kasar Sin ta aika da 'yan wasanta 57 don shiga kananan gasanni 25, a ciki kuma har da malam Liu Xiang, wanda ya rike da matsayin bajimta na duniya na wasan gudun ketare shinge mai tsawon mita 110, shi ne kuma zakara a gun taron wasannin Olympic na Athens a shekarar 2004, ban da wannan kuma, an mayar da shi dan wasa ne da mai yiwuwa ne zai sami lambar zinariya a wanna karo. Za a rufe gasar fid da gwani ta wasan tsalle-tsalle da guje-guje ta duniya a wannan karo a ran 2 ga watan Satumba.

Ran 26 ga wata, a birnin Ningbo da ke gabashin kasar Sin, an kammala gasanni na karon karshe na gasar ba da babbar kyauta ta wasan kwallon raga ta duniya a tsakanin mata a shekarar 2007. A cikin gasa ta karshe da aka yi, kungiyar wasan kwallon raga ta mata ta kasar Sin ta lashe takwararta ta kasar Brazil da cin 3 da ba ko daya, ta haka ta zama ta biyu saboda samun nasara a cikin gasanni 4 daga cikin dukkan gasanni 5 a wannan karo. Kungiyar kasar Netherlands kuwa ta zama zakara domin samun nasara a cikin dukkan gasanni 5.(Tasallah)