Za a yi taron wasannin Olympic na karo na 29 a nan Beijing a shekara mai zuwa, yanzu ba 'yan wasa na duk duniya da fararen hula na Beijing kawai suke mai da hankulansu kan wannan muhimmin taron wasannin motsa jiki ba, bakinmu da yawa na kasashen waje da suke zama a Beijing su ma sun nuna sha'awa ga taron wasannin Olympic na Beijing. Yau ma za mu tabo magana kan irin wannan iyali na bakinmu na kasar Poland.

Mr. Janusz Tatera da iyalinsa suna zama a Beijing a yanzu, a ran 9 ga wata, kwamitin shirya taron wasannin Olympic na Beijing ya fara daukar iyalan wasan Olympic daga duk duniya, zai zabi guda 10 daga wadanda suka yi rajista, zai gayyace su da su kawo ziyara Beijing a ran 8 ga watan Agusta na wannan shekara, wato lokaci ne da ya rage shekara daya da bude taron wasannin Olympic na Beijing. A daidai ran 9 ga wata, iyalin Mr. Tatera ya zama na farko da ya yi rajista bayan da aka soma wannan aiki.

Mr. Tatera ya ji alfahari ya gaya wa wakilinmu cewa, Beijing da shi sun kulla kauna a tsakaninsu a yayin da Beijing ke neman samun damar shirya taron wasannin Olympic na shekarar 2008, a ganinsa, shi ne mutum na farko da ya taya wa Beijing murnar cin nasarar samun damar shirya taron wasannin Olympic na Beijing.

A matsayinsa na babban sakataren kwamitin wasan Olympic na Poland, Mr. Tatera tare da sauran jami'an Poland sun halarci cikakken taron da kwamitin wasan Olympic na duniya ya yi a birnin Moscow a watan Yuli na shekarar 2001. A ran 13 ga watan Yuni na shekara 2001 da dare, kafin tsohon shugaban kwamitin Mr. Juan Antonio Samaranchi ya sanar da wace kasa ce ta sami damar shirya taron wasannin Olympic na shekarar 2008, Mr, Tatera ya zauna tare da wasu jami'an kungiyar wakilai ta Beijing mai kula da neman samun damar shirya taron wasannin Olympic na shekarar 2008. Kamar yadda ya faru a yanzu, Mr. Tatera ya waiwayi abubuwan da suka auku a lokacin can da Sinawa kimanin biliyan 1.3 suka ji matukar farin ciki. Ya ce,

'Ban san Beijing zai ci nasara ko a'a ba, amma bayanin da jami'an Beijing ya yi a karshe ya burge ni sosai. Ina tsammani cewa, ana sa ran sosai cewa, Beijing za ta sami wannan dama. A lokacin can, ana gudanar da dukkan abubuwa yadda ya kamata. A yayin da shugaba Samaranchi ya sanar da cewa, Beijing za ta shirya taron wasannin Olympic na shekarar 2008, na yi musafaha da jami'an kasar Sin don taya su murna.'

Game da dalilin da ya sa iyalinsa ya shiga aikin daukar iyalan wasan Olympic daga duk duniya, Mr. Tatera ya ce, taron wasannin Olympic na Beijing ya jawo hankulan mutane kwarai da gaske, yanzu mutane da yawa suna alla-alla zuwa kasar Sin da Beijing, iyalinsa na zaune a Beijing, babu tantama sun yi dabara don shiga yunkurin gudanar da taron wasannin Olympic na Beijing.

Mr Tatera da iyalinsa sun taba shiga taron wasannin Olympic har sau 6, su ne iyalin wasan Olympic na zalla. Matarsa madam Tatera ta waiwaya cewa,

'Ko wane taron wasannin Olympic ya sha bamban da juna. Amma birnin Atlanta ya fi burge ni. Shi ne taron wasannin Olympic na farko da iyalina muka halarta. A lokacin can 'yata ta kai shekaru 11 da haihuwa kawai, ta je biranen Chicago da Atlanta tare da mu, ta kuma taimaki kungiyar wakilan Poland wajen yin ayyukan gabatarwa. Ko da yake ba mu kalli dukkan gasanni ba, amma mun fahimci yanayin musamman na taron wasannin Olympic sosai.'

Irin kyakkyawar fasahar da ta samu a lokacin yarantakarta ta ba da tasiri mai kyau ga Beata Tatera, 'yar Mr. Tatera. Yanzu wannan budurwa mai shekaru 22 da haihuwa tana karatu a Beijing, ta iya Sinanci sosai, tana neman zama mai aikin sa kai na taron wasannin Olympic na Beijing. Ta ce,

'Kullum abokaina da yawa su kan tambaye ni yaya Beijing take, suna fatan za su zo kasar Sin. Ina fatan zan bai wa bakin duk duniya tallafi a lokacin da ake yin taron wasannin Olympic na Beijing.'

Saboda shiga ayyukan gudanar da taron wasannin Olympic ya kawo wa wannan iyalin wasan Olympic lokaci mafi farin ciki a duk rayukansu, shi ya sa sun yi kira ga fararen hula da su kara shiga yunkurin gudanar da taron wasannin Olympic, saboda taron wasannin Olympic zai ba da tasiri mai kyau gare su a cikin dogon lokaci. 'Yan birnin za su ji alfahari domin garinsu ya taba shirya taron wasannin Olympic.

Madam Tatera ta kuma bayyana cewa, yanzu a Beijing dukkan mutane suna share fage ga taron wasannin Olympic na Beijing kai tsaye ko a fakaice ta hanyoyi daban daban. Taron wasannin Olympic na kusa da mu sosai.(Tasallah)