Barkanku da war haka. Barkanmu da sake saduwa a wannan fili mai farin jini wato "kimiyya da ilmi da kuma kiwon lafiya na kasar Sin". A cikin shirinmu na yau, da farko za mu yi muku bayani kan cewa, tuka mota cikin dogon lokaci da rana zai kara hadarin kamuwa da sankarar fata, daga baya kuma za mu karanta muku wani bayani kan cewa, Jihar Chongqing ta kara zuba kudade wajen ayyukan jiyya da kiwon lafiya na kauyuka. To, yanzu ga bayanin.

Manazarta na kwalejin ilmin likitanci na jami'ar Saint Louis ta kasar Amurka sun gano cewa, game da mutane da su kan tuka mota cikin dogon lokaci a cikin zafin rana, hadarin kamuwa da ciwon sankarar fata zai karu gare su. Dalilin da ya sa haka shi ne sabo da fuska da hannunsu su kan sha hasken rana.

Bisa labarin da kafofin watsa labarai na kasar Amurka suka bayar a ran 6 ga wata, an ce, a cikin rahoton da suka gabatar ga taron shekara shekara kan ilmin kimiyya na fata na kasar Amurka a kwanan nan, manazarta sun bayyana cewa, yanzu yawancin gilas na motoci suna iya bayar da kariya sinadarin hasken ultraviolet maras karfi, amma ba su iya kare sinadarin hasken ultraviolet mai matukar karfi da kuma sauran sinadarin hasken rana. Sabo da haka, game da mutanen da su kan tuka motoci na dogon lokaci a karkashin hasken rana, musamman ma wadanda su kan bude tagogi lokacin da suke tuka motoci, sun fi saukin samun sinadarin hasken ultraviolet.

Bayan da manazarta suka gudanar da bincike kan mutane masu fama da ciwon sankarar fata na Amurka da yawansu ya kai 898, sun gano cewa, kashi 53 cikin dari dga cikinsu sun kamu da ciwon sankarar fata a bangaren hagu na jikinsu, dalilin da ya sa haka shi ne sabo da bangaren hagun jikinsu ya kan fuskantar hasken rana lokacin da ake tuka mota. Ban da wannan kuma kashi 64 cikin dari daga cikin wadannan mutane maza ne, dalilin da ya sa haka shi ne sabo da maza sun fi tuka motoci cikin dogon lokaci da rana idan an kwatanta da mata.

Scott Fosco, kwararre a fannin ilmin fata mai kula da binciken ya bayyana cewa, sun gudanar da wani binciken daban ga kasashen da kujerun tuka motoci suka a gafen dama, daga baya kuma suka gano cewa, game da wadanda su kan tuka motoci cikin dogon lokaci da rana na wadannan kasashe, hadarin kamuwa da ciwon sankarar fata ya samu karuwa, haka kuma su kan kamu da ciwon a bangaren dama na jikinsu.

Bugu da kari kuma rahoton ya ba da shawara ga wadanda su kan tuka motoci cikin dogon lokaci a karkashin hasken rana, kuma suke son bude tagogi a lokacin da suke tuka mota da su dauki matakai tun da wuri don yin rigakafi kan ciwon, kamar sa tagogi masu hana sinadarin hasken ultraviolet da dai sauransu.

Jama'a masu sauraro, yanzu sai ku huta kadan, bayan haka kuma za mu karanta muku wani bayani kan cewa, Jihar Chongqing ta kara zuba kudade wajen ayyukan jiyya da kiwon lafiya na kauyuka.