A cikin 'yan shekarun da suka wuce, wasu kafofin watsa labaru na kasashen waje sun ce, kasar Sin ta raya dangantakar da ke tsakaninta da kasashen Afirka domin samun man fetur da sauran albarkatu daga kasashen Afirka kuma da aiwatar da sabon mulkin mallaka a kasashen Afirka kawai. Game da irin wannan magana, Wen Jiabao ya nuna cewa, "Kowa ya sani, yanzu kasar Sin da wasu kasashen Afirka suna cinikin man fetur. Muna yin irin wannan cinikayya ne a bayyane kuma a fili bisa ka'idojin moriyar juna kamar yadda aka saba yi. Amma yawan kudin cinikayyar man fetur da muka yi da kasashen Afirka bai kai sulusi ba bisa yawan kudin cinikayyar man fetur da wasu manyan kasashe suke yi da kasashen Afirka."

Game da maganar aiwatar da sabon tsarin mulkin mallaka a Afirka, Wen Jiabao ya jaddada cewa, "Tabbas ne ba a iya fadi cewa kasar Sin tana aiwatar da sabon tsarin mulkin mallaka a Afirka ba. Tun daga shekarar 1840, wato shekarar da aka fara yin yaki da miyagun magani na opium, an yi mulkin mallaka a kasar Sin har tsawon shekaru kimanin 110. Al'ummomin kasar Sin sun san zafin da tsarin mulkin mallaka ya kai musu, sun kuma sani cewa dole ne a yi gwagwarmaya da mulkin mallaka. Wannan dalili ne da ya sa muka goyi bayan kasashen Afirka wajen neman 'yancin kai da bunkasuwa."

Daga karshe dai, Wen Jiabao ya ce, "Lokacin da take shan wahaloli iri iri, kasar Sin ta samar wa jama'ar kasashen Afirka taimako wajen shimfida hanyar dogo da ke hade da Tanzania da Zambia. Yanzu kasar Sin tana samun ci gaban tattalin arziki, ba za mu manta da tsofaffin abonkanmu ba. A kasar Sin akwai wani karin magana, wato sarari mai auna gudun doki, haka yau da gobe mai bayyana zuciyar mutum. Tarihi zai tabbatar da kome da kome." (Sanusi Chen)