Bayan shafe watanni da dakatar da zirga-zirgar jiragen saman kasashen waje, Ministan kula da sufurin jiragen sama na Nijeriya, Hadi Sirika, ya sanar da cewa, za a dawo da zirga-zirgar jiragen a ranar 29 ga wata.

A cewar Hadi Sirika, dawowar zirga-zirgar jiragen kasashen wajen, za ta gudana ne kamar yadda aka yi na cikin gida.

Ministan ya bukaci al'ummar kasar su yi hakuri da matakin dakatarwar da ake ciki, yana mai cewa za a sanar da ka'idojin dawo da zirga-zirgar jiragen a lokacin da ya dace. (Fa'iza Mustapha)