Rundunar sojin Najeriya ta sanar da cewa, sojoji sun yi nasarar kashe wasu kasurguman 'yan bindiga biyu a yayin wata musayar wuta da suka yi a jihar Taraba dake shiyyar arewacin kasar.

John Enenche, kakakin rundunar sojojin ya ce, dakarun sojojin kasar sun yi nasarar hallaka shahararrun 'yan bindigar biyu ne a ranar Juma'a wadanda sun jima suna addabar jama'a wajen kai hare hare a yankuna da dama a jihohin Benue da Taraba dake arewacin Najeriyar.

Ya kara da cewa, an samu nasarar ne sakamakon jajurcewar da sojojin suka nuna wajen yakar maharan a jihohin biyu.

Enenche ya ce, sojojin sun kaddamar da samamen ne bayan samun bayanan sirri dake tabbatar da gano maharan a ranar 10 ga watan Yuli a unguwar Chambe dake yankin Logo na jihar Benue bayan samun rahoton kashe wasu mazauna kauyen su biyu.(Ahmad Fagam)