Jiya Alhamis ne aka kawo karshen dukkan wasannin zagaye na farko, tsakanin kungiyoyin dake halartar gasar wasan kwallon kafa ta cin kofin duniya ta shekarar 2022 da ake bugawa a kasar Qatar.

Yayin wasan jiya, Portugal ta doke Ghana da ci 3 da 2, inda Cristiano Ronaldo dos Santos Aveiro na Portugal ya zama dan wasa na farko a tarihin gasar cin kofin duniya, wanda ya ci kwallo a kalla 1 a gasannin cin kofin duniya sau 5 a jere.

Haka kuma, Brazil wadda ake sa ran za ta iya lashe kofin, ta doke Serbia da ci 2 da nema. Kaza lika Uruguay da Koriya ta Kudu sun tashi kunnen doki maras ci. Kana kungiyar Switzerland ta doke Kamaru da ci 1 da nema.

A wasannin zagaye na 2 kuma, Portugal za ta buga wasa da Uruguay, yayin da Koriya ta Kudu za ta fafata da Ghana. Sa’an nan kungiyar Brazil za ta kara da Switzerland. (Tasallah Yuan)