Asusun tallafawa kananan yara na MDD UNICEF, ya sanar jiya Asabar cewa, ya yi matukar farin cikin sako dalibai da ‘yan bindiga suka yi garkuwa da su a makarantarsu tun watan Mayu a jahar Naija dake shiyyar arewa maso tsakiyar kasar Najeriya.

Abubakar Sani Bello, gwamnan jahar Naija, ya fada a taron manema labaru a Minna, babban birnin jahar cewa, mutanen kimanin 92, da suka hada da dalibai 90, sun samu ‘yancinsu ne bayan shafe tsawon watanni uku a hannun ‘yan bindigar da suka kaddamar da hari a makarantar Islamiyar Salihu Tanko Salihu dake garin Tegina a karamar hukumar Rafi dake jahar tun a ranar 30 ga watan Mayu.

A bayanin da aka fitar a ranar Asabar, Peter Hawkins, wakilin asusun UNICEF a Najeriya, ya ce, UNICEF tana taya iyayen yara daliban da suka samu ‘yanci murna, kana tana nuna juyayi da mika sakon ta’aziyya ga iyalan dalibi guda da ya mutu a hannun masu garkuwar.

Hawkins ya yi Allah wadai da hare-haren da ake kaiwa makarantun kasar mafi yawan al’umma a nahiyar Afrika musamman a watannin baya-bayan nan.

A cewar jami’in asusun na UNICEF, ilmi shi ne muhimmin ginshiki na hakkokin kowane yaro, kuma duk wani yunkuri na kaddamar da hari kan makarantun ilmi tamkar take wannan hakki ne.(Ahmad)