A ran 5 ga wata da safe a birnin Beijing, an bude taron shekara shekara na majalisar wakilan jama'ar kasar Sin wato hukumar koli ta kasar Sin. Wannan ya zama taro na farko na sabuwar majalisar wakilan jama'ar kasar Sin wato majalisa ta 11. Firayin ministan kasar Sin Mr Wen Jiabao ya gabatar da rahoton aiki a madadin gwamnatin da za ta gama wa'adinta a nan gaba ba da dadewa ba, inda ya gabatar da shawarar mayar da makasudin bunkasuwar tattalin arziki da kasar Sin ta samu a shekarar bana a matsayin kashi 8 daga cikin dari. Shugaban kasar Sin Mr Hu Jintao, da Wu Bangguo, da Wen Jiabao, da Jia Qinglin, da Li Changchun, da Xi Jinping, da Li Keqiang, da He Guoqiang, da Zhou Yongkang da dai sauran shugabannin Jam'iyyar Kwaminis ta Sin da na gwamnatin kasar Sin da wakilan majalisar da ya kai kusan dubu 3 sun halarci taron budewa. Shugaban kwamitin din-din-din na majalisar wakilan jama'ar kasar Sin Mr Wu Bangguo ya shugabanci wannan taro. Firayin ministan kasar Sin Mr Wen Jiabao ya bayyana cewa, a cikin wa'adin aiki na wannan gwamnati wato shekaru 5 da suka gabata, matsakaiciyar jimlar kudin kayayyakin da aka samar a gida na kasar Sin a ko wace shekara ta karu da kashi 10.6 cikin kashi dari. Ya zuwa shekarar 2007, yawan jimlar kudin kayayyakin da aka samarwa a gida na kasar Sin da kuma jimlar kudin cinikayyan shigi da fici ya kai matsayi 4 da 3 a duk duniya. Bayan da ya takaitaci nasarorin da aka samu a yayin da ake gudanar da harkokin gwanati, Mr Wen ya gabatar da shawarar tafiyar da zaunanniyar manufar kudi da kuma sarrafa kudade a cikin shekarar bana, da kuma tsayawa kan manufar diplomasiyya na zaman lafiya da 'yancin kai.

Bisa labarin da muka samu, an ce, a cikin taron da za a shafe kwanaki 13 da rabin ana yinsa, za a dudduba da kuma tattaunawa kan rahoton aiki na gwamnati, da shirin kasafin kudi, da rahotannin aikin shekara shekara daga taron kwamitin din-din-din na majalisar wakilan jama'ar kasar Sin, da kotun koli ta jama'ar kasar Sin, da Hukumar koli ta bin bahasi ta jama'ar kasar Sin, da kuma shirin yin gyare gyare kan hukumomin majalisar gudanarwa ta kasar Sin.

Wa'adin aikin ko wane taron majalisar wakilan jama'ar kasar Sin ya kai shekaru 5, a cikin taro na wannan karo, za a zabi sabuwar gwamnati. Za a zabi shugaban sabon kwamitin din-din-din na majalisar wakilan jama'ar kasar Sin da mataimakinsa, da shugaban kasar Sin da mataimakinsa, da shugaban hukumar sojoji ta kwamitin tsakiya na Jam'iyyar Kwaminis ta Sin, da shugaban kotun koli ta jama'ar kasar Sin, da shugaban Hukumar koli ta bin bahasi ta jama'ar kasar Sin, da kuma tabbatar da jami'an sabuwar gwamnati ciki har da firayin ministan majalisar gudanarwa ta kasar Sin da dai sauransu.(Danladi)