A cikin shirinmu na yau, za mu kai ziyara ga sansannun kwarin Jiuzhaigou da kuma wurin shakatawa na Huanglong da ke yammacin lardin Sichuan, wadanda Sinawa su kan mayar da su tamkar Aljannar da ke duniyarmu. Da farko dai, za mu gabatar muku da tambayoyi 2, su ne, ko asalin sunan kwarin Jiuzhaigou yana da nasaba da kauyuka 9 na kabilar Zang da ke cikin wannan kwari ko a'a. Na biyu, ko an tanadi kwarin Jiuzhaigou da wurin shakatawa na Huanglong a kan takardar sunayen wuraren tarihi na halitta na duniya ko a'a? Jama'a masu sauraro, sai ku karkade kunnuwanku don jin abubuwan da muka shirya, ta haka za ku amsa tambayoyin da muka yi muku.

Kwarin Jiuzhaigou yana shiyya mai cin gashin kanta ta kabilun Zang da Qiang ta Aba da ke yammacin lardin Sichuan na kasar Sin, siffarsa ta yi kama da harafin Turanci na 'Y'. An nada wannan kwari mai zurfin kilomita fiye da 40 da sunan kwarin Jiuzhaigou saboda ana kasancewa da kauyuka 9 na kabilar Zang a wurin.