Wuqing a ganin Garba

Yankin Wuqing mai karamci ga baki

Tawagar gidan rediyon kasar Sin da ta ziyarci garin Wuqing dake yammacin birnin Tianjin na kasar ta Sin a ranar Juma'a 8 ga watan Mayun shekara ta 2009, ta samu kyakkyawar tarba daga mahukuntan garin.

Mun sauka a otal din Swan lake International Hotel inda aka shirya mana kyakkyawar tarba ta hanyar shirya mana lokacin cin abinci na gargajiyar garin, koda yake dama Sinawa sun saba saukar baki ta hanyar shirya kabakin nau'o'in abinci. Bayan kammala cin abinci, an kai mu wajen da aka shirya mana wasannin wake-wake da wasu daga cikin mahukunta garin da kansu suka rera.

Kafin mu kai ga wannan waje na kasaita da muka sauka, wani abin sha'awa shi ne mun wurwuce wasu manya-manyan kamfuna da suka yi mana marhabi.

Yankin Wuqing yana tsakanin birnin Beijing da na Tianjin , ya kai muraba'in kilomita 1574, ya kunshi garuruwa 29 da kauyuka 712, yawan mutane a Wuqing ya kai dubu 830, an kafa yankin Wuqing a watan Yuni na shekarar 2000.

A shekarar 2008, yawan kudin da yankin Wuqing ya samu ta fannin samar da kayayyaki ya kai kudin Sin na RMB biliyan 20, wannan ya karu da kashi 21 cikin kashi 100 bisa na shekarar 2007. Yanzu, yankin Wuqing ya sami ci gaba sosai wajen bunkasa sababbin kauyuka da habaka masana'antu, na yin keke, da kafet.