Hukumar dake kula da kayayyakin tarihi ta kasar Sin (NCHA) ta sanar a jiya Lahadi cewa, za'a gudanar da bikin tunawa da ranar cibiyoyin adana kayayyakin tarihi ta kasa da kasa wanda ya dace da ranar 18 ga watan Mayu.

Cibiyar adana kayayyakin tarihi ta lardin Hunan dake tsakiyar kasar Sin ita ce za ta dauki bakuncin shirya wani gagarumin bikin baje kolin musamman game da ruhin wayewar kan al'ummar Sinawa.

Sauran cibiyoyin adana kayayyakinn tarihi a fadin kasar Sin su ma za su kaddamar da wasu muhimman ayyuka da suka shafi jigon bikin mai taken "Gidan adana kayayyakin tarihi a matsayin cibiyoyin raya al'adun gargajiya: makomar al'adun gargajiya," in ji hukumar ta NCHA.

Guan Qiang, mataimakin daraktan hukumar ya ce, shagulgulan za su mayar da hankali ne kan batun muhimmanci da irin rawar da cibiyoyin adana kayayyaki ke takawa wajen kiyaye al'adun da aka gada tun zamanin kakanni, kuma ana sa ran cibiyoyin za su mayar da hankali wajen daga matsayin sauye sauye da raya ci gaban fasahohin kirkire kirkire ta hanyar kyawawan al'adun gargajiyar kasar Sin.(Ahmad Fagam)