Wu Haitao, mataimakin wakilin kasar Sin a MDD, ya furta a jiya Jumma'a cewa, ya kamata MDD ta kara tattaunawa da kasar Syria, don gaggauta kafa majalisar tsarin mulki a kasar, da za ta wakilci bangarori daban daban, wadda kuma za ta karbu ga kowa.

Wu Haitao ya ce ta haka ne za a biya bukatun gwamnati da sauran bangarorin kasar, gami da kaddamar da wani shirin siyasa mai dorewa a kasar.

Jami'in, ya bayyana haka ne a wajen wani taron kwamitin sulhu na MDD mai alaka da aikin daidaita harkokin siyasa a kasar Syria, inda ya ce an kusa kawo karshen dukkan manyan rikice rikicen kasar. A cewarsa, kasar Sin ta ji dadin yadda kasashen Rasha da Turkiya da Iran suka sanar da ci gaba da yakar ta'addanci a Syria, da taimakawa aikin maida da tsarin siyasa kasar.(Bello Wang)