Hukumar zabe mai zaman kanta a Najeriya wato INEC ta ayyana shugaba Muhammadu Buhari a matsayi wanda ya lashe zaben shugabancin kasar da ya gudana a ranar Asabar din da ta gabata.

Shugaban hukumar Mahmod Yakubu ya ce, Buhari dan takarar jam'iyyar APC mai mulkin kasar ya samu kuru'u 15,191,847 wato kaso 55.6 cikin 100 a kuru'u 27,324,583 da aka kada a lokacin zaben. Yayin da abokin hamayyarsa Atiku Abubakar na jam'iyyar adawa ta PDP ya samu kuru'u 11,262,978 ko kuma kaso 41.2 cikin 100 na kuru'un da aka kada.(Ibrahim)