Kwanan baya, birnin Beijing na kasar Sin ya sanar da shirinsa na raya tsarin sadarwa na 5G cikin shekaru 3 masu zuwa, wanda ya tanadi cewa, daga yanzu zuwa shekara ta 2022, kamfanonin sadarwa dake birnin za su zuba jarin da yawansa ya zarce Yuan biliyan 30 (kwatankwacin dalar Amurka biliyan 4.42) don kafa tsarin sadarwa na 5G, wanda zai kunshi yankuna daban daban masu muhimmanci na birnin.

Karkashin shirin, za a yi kokarin kyautata fasahar samar da na'urorin da ake bukata, da fara gwada amfani da sabon tsarin sadarwar 5G, inda za a samar da tsarin sadarwa mai inganci a birnin Beijing, wanda zai zama kan gaba a kasar Sin a wannan fanni.

Ana kyautata zaton cewa, zuwa shekarar 2022, cibiyoyin nazarin kimiyya da fasaha da kamfanonin sadarwa dake birnin Beijing, za su mallaki fiye da kashi 5% na daukacin fasahohi masu alaka da 5G, ta haka za a samar da ribar da yawanta zai kai Yuan biliyan 200 (kwatankwacin dalar Amurka biliyan 29.5), sa'an nan za a kafa sabbin kamfanonin da masana'antu masu alaka da wannan fannin, wadanda darajarsu za ta zarce Yuan biliyan 1000 (kwatankwacin dalar Amurka 147.4). (Bello Wang)