Kakakin ma'aikatar harkokin wajen kasar Sin Hua Chunying, ta ce kasar Sin na fatan yin kokari tare da kasashe daban daban, a fannin inganta shawarwari, game da yarjejeniyar abokantaka kan tattalin arziki a dukkan fannoni a yankin Asiya da Pasific wato RCEP a takaice, bisa manufar nuna girmamawa ga juna da fahimtar juna, ta yadda jama'ar kasashen yankin za su gaggauta cin gajiya daga matakin.

Hua ta bayyana haka ne, a yayin taron manema labaru da aka shirya a yau Alhamis a nan birnin Beijing, inda ta kara da cewa, yarjejeniyar ta RCEP, ta kasance yarjejeniyar cinikayya cikin 'yanci mafi girma da muhimmanci a yankin Asiya da Pasific, kuma idan aka cimma yarjejeniyar, za ta shafi kusan rabin al'ummun duniya baki daya, da kusan kashi 1 cikin 3 na yawan cinikayyar duniya.

An kira taron shugabanni game da yarjejeniyar RCEP karo na 2 a jiya Laraba a kasar Singapore, wanda ya samu halartar firaministan kasar Sin Li Keqiang. Hadaddiyar sanarwar da aka fitar a gun taron ta ce, an riga an samu hakikanin ci gaba a shawarwarin na RCEP, kuma bangarori daban daban sun bayyana niyyarsu, ta cimma yarjejeniyar a shekarar 2019. (Bilkisu)