An bude taron yini biyu kan Libya a birnin Palermo dake kudancin kasar Italiya jiya da yamma, da nufin samar da managartan matakan wanzar da zaman lafiya a kasar dake arewacin Afrika.

An tsaurara tsaro, inda aka girke 'yan sanda a kan titunan dake zagaye da wurin da ake gudanar da taron.

Firaministan Italiya Guiseppe Conte ya yi wa shugabannin tawagar dake halartar taron maraba. Dukkan bakin sun ci abincin dare tare a jiyan, bayan bikin bude taron da za a shafe yinin yau Talata baki daya ana yi.

Wata sanarwa da ofishin firaministan kasar ya fitar, ta ce Italiya ce ta shirya taron da hadin gwiwar shirin wanzar da zaman lafiya na MDD dake aiki a Libya UNSMIL, domin samar da managartan shawarwari ga tsarin wanzar da zaman lafiya a kasar.

Har ila yau, sanarwar ta ce taron na da nufin samar da ingantacciyar ci gaba a fannin tsaro da tattalin arziki. (Fa'iza Mustapha)