Kasar Sudan ta kudu ta mika bukatar neman shiga tsakani domin tattaunawar sulhu tsakanin makwabciyarta gwamnatin kasar Sudan da kungiyoyin 'yan tawayen kasar ta Sudan, 'yan watanni kadan ke nan bayan da Khartoum ta shiga tsakani wajen cimma yarjejeniyar zaman lafiya.

Tut Gatluak, mashawarci na musamman ga shugaban kasa kan harkokin tsaro, ya fadawa 'yan jaridu a jiya Litinin cewa, gwamnatin Sudan da kungiyoyin 'yan tawayen kasar sun amince da tayin da Juba ta yi musu na shiga tsakani don tattaunawar sulhun, wanda ake sa ran gudanarwa a makon gobe.

Kasar ta Sudan ta jima tana fuskantar rikici da kungiyoyin 'yan tawaye masu fafutukar ceto al'ummar Sudan wato (SPLM-N) a kudancin Kordofan da jahar Blue Nile tun a shekarar 2011.

An sha yunkurin shirya tattaunawar sulhu a lokuta da dama da nufin kawo karshen tashin hankalin dake cigaba da ta'azzara a yankunan biyu na kan iyakokar Sudan da Sudan ta kudun amma al'amarin ya ci tura. (Ahmad)