Gwamnatin Nijeriya ta tabbatar da nadin Matthew Seiyefa, jami'i mafi matsayi a hukumar tsaro ta farin kaya DSS, a matsayin mukaddashin shugaban hukumar.
Matthew Seiyefa, ya gana da mukaddashin shugaban kasar Yemi Osinbajo a fadar gwamnatin kasar, bayan an sallami tsohon shugaban hukumar Lawal Daura.
Yemi Osinbajo, ya ba da umarnin sallamar Lawal Daura ne bisa yi wa tsaron kasa karan tsaye, sanadiyyar kawanyar da jami'in hukumar ta farin kaya da suka rufe fuskokinsu suka yi wa ginin majalisar dokokin kasar.
Matthew Seiyefa, wanda ya fito daga jihar Bayelsa mai arzikin man fetur, ya taba rike mukamin daraktan cibiyar nazarin harkokin tsaro ta kasar, kafin daga bisani a mayar da shi hedkwatar hukumar tsaro ta farin kaya. (Fa'iza Mustapha)