Shugaban kasar Sin Xi Jinping, wanda har yanzu haka ke ziyarar aiki a kasashen waje, ya ba da muhimmin umurni, game da allurar rigakafin cuta ta kamfanin halittu na Changsheng dake birnin Changchun a lardin Jilin, inda ya ce, mugun aikin da kamfanin ya yi na samar da allurar rigakafin cuta maras inganci abu ne mai ban mamaki.

Ya ce dole ne kananan hukumomin da lamarin ya shafa su mai da hankali a kai, su yi bincike ba tare da bata lokaci ba. Kana su yanke hukunci mai tsanani kan wadanda suka aikata laifukan. Xi ya jaddada cewa, kamata ya yi a mai da kiwon lafiyar jama'a a gaban kome a kuma ko yaushe. Kaza lika a kyautata tsarin gudanar da harkokin allurar rigakafin cututtuka, don ba da tabbaci ga babbar moriyar jama'a, da zaman karkon al'umma. (Bilkisu Xin)