Kungiyoyin ciniki kimani 60 na Amurka sun yi hadin kai don yin kira ga majalisar dokokin kasar da ta kara karfin sa ido kan manufar ciniki da kasar ke dauka da sake daidaita karfin ikon majalisar da sassan gwamnati, wadannan kungiyoyi na kunshe da kuniyar man fetur, kungiyar wake, kwamitin cinikayyar shige da fice ta kasar da dai sauransu.

A cikin wata wasikar da wadannan kungiyoyin suka gabatar, sun bayyana cewa, a matsayinsu na wakilin dake wakiltar moriyar sassan masu samar da kayayyaki da masu sayar da kayayyaki da kamfanonin kimiyya da fasaha da manoma da kuma kamfanonin amfanin gona da dai sauransu, suna nuna damuwa sosai kan hanyar da gwamnatin ke dauka na warware bambamcin ra'ayi ta fuskar ciniki wato kara kakabawa sauran kasashen haraji da kayyade kason cinikin shigo da kayayyaki.

Kuma sun yi gargadi cewa, barazana tsakanin Amurka da abokan cinikinta da ya kara yin tsami zai haddasa yanayi maras tabbaci sosai, karin harajin da gwamnatin ta kakabawa kayayyakin da take shigowa daga sauran kasashe da martanin da kasashen suka mayar zai kawo illa ga bunkasuwar tattalin arzikin Amurka, har ma zai kara yawan kudin da kamfanoni da iyalan Amurka za su kashe nan gaba. (Amina Xu)