Sakataren harkokin wajen Amurka Mike Pompeo ya shedawa manema labarai a jiya cewa, ya zuwa yanzu ba a san ko za a gudanar da ganawa tsakanin shugabannin Amurka da Koriya ta arewa da aka shirya yi a ran 12 ga watan Yuni a Singapore ko a'a ba, amma bangarorin biyu sun samu sakamako mai armashi a shawarwarin da suka yi sa'o'i 72 da suka gabata.

A jiya da safe ne kuma Mike Pompeo ya yi shawarwari da mataimakin shugaban kwamitin koli na jam'iyyar KWP ta Koriya ta arewa Mista Kim Yong-chol, inda ya bayyana imanin bangarorin biyu na bin hanyar da ta dace bayan shawarwarinsu. Kuma Amurka na fatan za a gudanar da ganawa tsakanin kasashen biyu kamar yadda aka tsara

Ban da wannan kuma, Mike Pompeo ya ce, Amurka ta bayyanawa Koriya ta arewa manufarta wato cimma kwakkwarar hanyar kawar da makaman nukiliya a zirin Korea. Ya kara da cewa, Amurka na fatan shawo kan Koriya ta arewa ta fahimci cewa, kasar za ta kara samun tsaro, idan har aka kawar da makaman nukiliya a zirin na Koriya, kuma tuni bangarorin biyu suka gudanar da jerin tattaunawa kan wannan batu. (Amina Xu)