Shugaban kasar Guinea Alpha Conde, ya bayyana Ibrahima Kassory Fofana a matsayin wanda ya nada mukamin firaministan kasar gabanin kafuwar sabuwar gwamnati, yayin wata sanarwa da aka watsa ta kafofin watsa labaran kasar.

Shugaba Conde ya yi amfani ne da wata dokar shugaban kasa wajen zartas da wannan mataki. Kaza lika ya umarci manyan sakatarorin ma'aikatun kasar, da su ci gaba da gudanar da ayyukan hukuma na yau da kullum, har zuwa lokacin da za a kaddamar da sabuwar gwamnati.

Kafin nadinsa a mukamin na firaminista, Ibrahima Kassory Fofana shi ne minista mai lura da harkokin zuba jari, da hulda da jama'a, da kuma ayyukan sassa masu zaman kan su na kasar. (Saminu Hassan)