Wani jami'in 'yan sanda Ed Barberini a birnin San Bruno, dake da tazarar kilomita 19 a kudancin tsakiyar birnin San Francisco a yammacin Amurka ya bayyana cewa, ana zargin wata mace ce ta kaddamar da harbe harben, inda daga bisani kuma ta harbe kanta bayan da ta raunata mutane masu yawa a harabar ginin ofishin na YouTube.
An yi harbe harben ne da misalin karfe 12:48 na yammaci, a wajen harabar ofishin na YouTube wanda rukunin gidajen ke dauke da ma'aikata kimaini 1,700.
Jami'an 'yan sanda suna cigaba da bincike domin gano ko akwai wasu maharan a cikin ginin.
Barberini ya bayyana cewa, an garzaya da mutanen 4 da suka jikkata zuwa wani asibiti mafi kusa domin ba su maganin raunukan da suka samu a sanadiyyar harbin bindigar.(Ahmad Fagam)