Yan tawayen Houthi na kasar Yemen sun harba makamai masu linzami dake cin dogon zango, zuwa filayen jiragen sama na kasa da kasa guda 4 dake Saudiyya da tsakar daren jiya Lahadi.
Kamfanin dallancin labarai na SABA dake karkashin 'yan tawayen, ya ruwaito cewa, harin umarni ne daga shugaban kungiyar Abdul-Malik al Houthi, haka zalika, ramuwa ce kan dakarun kawance da Saudiyya ke jagoranta, na amfani da duk wani makami a yakin da suke a Yemen.
Kungiyar ta kara da cewa, ta kuma harba wasu makamai masu linzami zuwa wasu wurare a Saudiyyan, sai dai ba ta bayyana sunayen wuraren ba.
Hare-haren na zuwa ne jim kadan bayan shugaban 'yan tawayen Abdul-Malik al-Houthi ya gabatar da jawabi a talabijin, ta wasu tasoshi da kungiyar ke iko da su, domin tunawa da ranar da ake cika shekaru 3 da yakin da kungiyarsa ke yi da gwamnatin Yemen, dake samun goyon bayan kasashen duniya da kuma dakarun kawance da Saudiyya ke jagoranta. (Fa'iza Mustapha)
