Mutane a kalla 5 sun mutu, wasu da dama kuma sun jikkata sanadiyyar fashewar bam cikin wata mota mai shake da boma bomai a birnin Mogadishu na Somalia a ranar jiya Lahadi.
Wani dan sanda da ya nemi a sakaya sunansa, ya shaidawa kamfanin dillancin labarai na Xinhua cewa, bam din ya tashi ne a hanyar shiga ma'aikatar kula da harkokin cikin gida ta kasar, inda ya ce, sun tabbatar da mutuwar mutane 5.
Wani ganau mai suna Mohammed Abdinasir, ya ce bam din ya fashe ne a wajen binciken ababen hawa dake gaban ma'aikatar kula da harkokin cikin gida.
Ya kara da cewa, 'yan sanda na binciken motoci da dama dake wajen a lokacin da bam din ya tashi.
Harin ya auku ne kasa da mako guda, bayan an kai wani mummunan hari a otel din Wehliye dake tsakiyar birnin, al'ammarin da ya yi sanadin rayuka 14.
Kawo yanzu dai, babu wata kungiya da ta dauki alhakin kai harin. (Fa'iza Mustapha)
