Jami'an dake halartar taro karo 9, na yammaci da tsakiyar nahiyar Afrika kan hakar ma'adinai a birnin Accran kasar Ghana, sun tabbatar da cewa, yankunan biyu sun mallaki wasu albarkatu fiye da ko ina a duniya.

Da take bude taron, mataimakiyar ministan filaye da albarkatu na Ghana Barbara Oteng-Gyasi, ta ce wannan na daya daga cikin dalilan da suka sa yankunan suka zamo cibiyar zuba jari kan harkokin hakar ma'adinai a nahiyar Afrika.

A don haka, mataimakiyar ministar ta yi kira da a lalubo hanyoyin da kasashen Afrika wadanda suka mallaki ma'adinai, za su yi amfani da su wajen samar da ci gaban zaman takewa da tattalin arziki a nahiyar.

Taron na yini biyu da kamfanin hakar ma'adinai na Magenta Global ya shirya, ya samu mahalarta da masu baje koli daga kasashen Ghana da Benin da Burkina Faso da Senegal da sauran wasu kasashen Afrika da na Turai da Amurka.

A daidai lokacin da kamfanin Magenta Global ke farfadowa daga kalubale mafi tsanani da ya fuskanta a baya-bayan nan, babbar jami'ar zartarwa ta kamfanin Maggie Tan, ta ce yankunan yammaci da tsakiyar Afrika sun dawo fagen jan hankalin jama'a. (Fa'iza Mustapha)