Daraktar sashen kula da magunguna da kayayyakin kula da lafiya na hukumar WHO Suzanne Hill, ta bayyana cewa an tabbatar da wadannan magunguna da kasashen biyu ke samarwa suna da matukar inganci wajen yaki da cututtukan dake yaduwa a yankuna masu fama da zafi.
Hill ta shedawa kamfanin dillancin labarai na Xinhua cewa, magungunan cuta mai karya garkuwar jiki wato "HIV/AIDS, da na malariya, da magungunan dake rigakafin kamuwa da kwayoyin cuta wadanda ake samar da su daga kasashen Sin da Indiya ana iya samunsu a cibiyoyin kiwon lafiya na kasashen Afrika, kuma an yi amanna cewa magungunan suna da matukar inganci kuma suna yin tasiri wajen inganta lafiyar jama'ar nahiyar ta Afrika".
Jami'ar ta bukaci gwamnatocin kasashen Afrika su fara hada magungunan a cikin gida kuma su tabbatar da sun samar da magunguna masu inganci wadanda zasu samar da ingantacciyar lafiya ga al'ummarsu.
