Shugaban kasar Sin Xi Jinping ya bayyana a yau Lahadi cewa, yana burin tabbatar da ganin dakarun sojin kasar Sin sun zama masu karfi fiye da yadda ake tsammani, sannan ya nanata bukatar gina rundunar 'yantar da jama'ar kasar Sin wato PLA ta yadda za ta iya kasancewa rundunar soji mafi karfi a duniya, mai cike da kwarin gwiwa, da kuma karfin tunkarar abokan gaba masu yin kutse don wanzar da zaman lafiya a duniya baki daya.

Xi, wanda shi ne babban sakataren jam'iyyar kwaminis na kasar Sin CPC, kana shugaban kwamitin tsakiya mai kula da harkokin soja na kasar, ya gabatar da muhimmin jawabi bayan duba babban faretin sojojin kasar da aka gudanar a sansanin horaswa na Zhurihe dake yankin arewacin Mongoliya ta gida mai cin gashin kai a lokacin bikin murnar cika shekaru 90 da kafuwar PLA, wanda ya fado a ranar 1 ga watan Augasta.

Wannan shi ne karo na farko da kasar Sin ta gudanar da bikin ranar PLA tare da gudanar da faretin soji, tun lokacin kafuwar Jamhuriyar Jama'ar Sin a shekarar 1949. (Ahmad Fagam)