Babban bankin duniya ya baiwa gwamnatin kasar Saliyo tallafin kudi har dalar Amurka miliyan 10, domin inganta harkokin mallakar filaye. Daraktan bankin dake Saliyo Parminder Brar ne ya bayyana hakan a ranar Laraba, yana mai cewa matakin, na da nufin baiwa kasar damar fita daga matsalolin da mallakar filaye ke haifarwa ga al'ummarta.

Mr. Brar ya bayyana hakan ne, yayin bude wani taron karawa juna sani na yini biyu, game da batun mallakar filaye da aka yiwa lakabi da "Mafita game da sauye sauye a fannin mallakar filaye a Saliyo." Ya ce bankin duniya ya damu da wannan lamari ne, duba da tasirin sa ga tattalin arziki da rayuwa, gami da zamantakewar al'ummar Saliyo.