Da misalin karfe 11 na daren jiya, cibiyar bada umurni ga ayyukan ceto dake garin Mao na lardin Sichuan dake kudu maso yammacin kasar Sin ta kira taron manema labarai, inda mataimakin gwamnan yankin Aba na kabilun Zang da Qiang mai cin gashin kansa inda bala'in zabtarewar laka ya afku, ya bayyana cewa, yayin faruwar ibtila'in, akwai masu yawon shakatawa 142 wadanda suka yi bulaguro zuwa wurin. Yanzu an riga an tuntubi dukkaninsu, da kara sanin halin da suke ciki, kuma dukkansu sun rigaya suna janye daga wajen.

Bugu da kari kuma, an samu bayanai na mutane 118 wadanda suka bace, kuma za'a wallafa wadannan bayanai ba tare da bata lokaci ba a shafin Intanet na gwamnatin yankin Aba. Har wa yau kuma, gwamnatin yankin Aba ta bude wani layin waya na musamman, domin samun bayanai daga bangarori daban-daban game da mutanen da suka bace.(Murtala Zhang)