A jiya Alhamis ne kwamitin sulhu na MDD ya amince bai daya da wani kuduri da ke bukatar katse duk wasu kafofin da kungiyar IS ke samun kudadenta, a wani mataki da kasashen duniya ke dauka na yaki da ayyukan ta'addanci.

Sauran matakan da kwamitin ya amince da su kan kungiyar ta IS sun hada da kwace kadarori, haramta yin tafiye-tafiya da kuma hana sayarwa kungiyar da ake kira ISIL da kuma Daesh makamai.

Bayanai na nuna cewa, yanzu haka kungiyar na rike da wurare da dama na kasashen Syria da Iraki, ciki har da filayen mai da iskar gas

Kudurin ya kuma lura da cewa, kungiyar ISIL da ke da alaka da kungiyar al-Qaida, wata babbar barazana ce ga harkokin tsaro a duniya baki daya. A saboda haka, kudurin ya ce, hanya guda ta kawar da wannan kungiya ita ce, kungiyoyi na kasa da kasa da na shiya-shiya da daukacin kasashen duniya su hada kai bisa dokokin kasa da kasa da ka'idojin MDD.

A jawabinsa gabanin amincewa da wannan kuduri, babban sakataren MDD Ban Ki-moon, ya ce, kungiyar Daesh da sauran kungiyoyin 'yan ta'adda suna watsa munanan ikidunsu tare da kai hare-hare kan fararen hula. Don haka wajibi ne a tashi tsaye don ganin an toshe dukkan kafofin da suke samu kudaden su kafin su kara yin illa ga al'umma.(Ibrahim)