Jiya ne a birnin Xiamen da ke nan kasar Sin hukumar kula da harkokin cinikayya da bunkasuwa ta MDD ta fitar da wani rahoto game da harkokin zuba jari a duniya a shekarar 2015, inda ta bayyana cewa, yawan jarin da kasashen waje suka zuba ga kasar Sin kai tsaye a shekarar 2014 ya kai dala biliyan 129, wanda ya karu da kashi 4 cikin dari bisa na makamancin lokacin shekarar 2013, lamarin da ya baiwa kasar Sin damar zarce kasar Amurka wajen jawo jarin kasashen waje a duniya a karon farko.

A cewar rahoton, kasashe ko yankuna 10 da suka fi jawo jarin kasashen waje a duniya a shekarar 2014 sun hada da Sin, yankin Hongkong, Amurka, Britaniya, Singapore, Brazil, Canada, Australia, Indiya da kuma Netherlands.

Shugaban sashen kula da harkokin zuba jari da kamfanoni na hukumar Zhan Xiaoning ya bayyana cewa, wannan rahoto ya shaida cewa, Sin tana daya daga cikin manyan kasashe ko yankunan da suka fi jawo hankulan masu sha'awar zuba jari a duniya, kana Sin ta kara taka muhimmiyar rawa wajen inganta harkokin zuba jari a duniya. (Zainab)