An shirya wannan taron tattaunawa ne a daidai lokacin da kungiyar cinikayya ta duniya wato WTO da kungiyar kiyaye ikon mallkar ilmi ta duniya za su fara yin sababbin shawarwari kan ikon mallakar ilmi. Taron ya gayyaci shahararrun masanan ilmi na duniya don su bayyana halin da ake ciki dangane da aiwatar da ikon mallakar ilmi a duk duniya, saboda haka wakilai mahalartan shawarwarin cinikayya na kasashe masu tasowa da yawa sun halarci taron. Da Malama Li Xuan, babban masanin ilmin tattalin arziki ta cibiyar kudu ta tabo magana a kan makasudin wannan taro, sai ta bayyana cewa, "wannan ne karo na farko da kasashe masu tasowa suka shirya taron tattaunawa a kan aiwatar da ikon mallakar ilmi. Bisa matsayinta na kungiyar gwamnatocin kasashe masu tasuwa, cibiyar kudu ta shirya wannan taron tattaunawa, domin taimakawa kasashe masu tasowa wajen magance matsi da ake yi musu a fannin kare ikon mallakar ilmi, da kuma binciken hanyar da za a bi don amfana wa kasashen masu tasowa wajen yin kirkire-kirkire da bunkasa harkokin tattalin arziki."

Yayin da mahalarta taron ke bayar da jawabai, sun nuna cewa, yanzu an riga an shiga zamanin tattalin arziki na ilmi a duk duniya. Malam Sun Zhenyu, jakadan kasar Sin a kungiyar cinikayya ta duniya shi ma ya bayar da jawabi inda ya ce, ya kamata, kasashe masu tasowa su shigar da aikin kirkirawa, da na kiyaye ikon mallakar ilmi cikin manyan tsare-tsarensu na bunkasuwa. Ya kara da cewa, "muna bukatar samun ikon mallakar ilmi, da yin amfani da shi da kula da shi da kuma kiyaye shi, ta yadda za mu kara kwarewa wajen samun sabuwar fasaharmu. Sa'an nan mu shigar da sabbin abubuwan kirkirawa cikin kasuwanni daga dakunan gwaji da cibiyoyin nazari, ta yadda za mu bunkasa tattalin arzikin kasashenmu ta hanyar kirkirawa ba cikin dogara da albarkatu ba."